Milliyyətçi Hərəkat Partiyasının (MHP) sədri Dövlət Bahçeli tərəfindən hədiyyə olaraq Şuşa şəhərində Üzeyir Hacıbəyli adına incəsənət məktəbinin inşa edilməsi təşəbbüsü Azərbaycan tərəfdən minnətdarlıqla qarşılanmışdı.
Bunu Azərbaycan Respublikası Prezidentinin köməkçisi, Prezident Administrasiyası xarici siyasət məsələləri şöbəsinin müdiri Hikmət Hacıyev AzərTAc-a açıqlamasında deyib.
Hikmət Hacıyev qeyd edib ki, Prezident İlham Əliyev mayın 27-də Türkiyənin milli təhsil nazirini qəbul edən zaman Cümhurbaşqanı Rəcəb Tayyib Ərdoğanın Şuşaya gözlənilən səfəri çərçivəsində Türkiyə tərəfindən təklif edilmiş bir hədiyyə kimi, məktəbin təməlqoyma mərasiminin proqramda əksini tapdığını bildirmişdi.
“Mütəxəssislər səviyyəsində incəsənət məktəbi binasının memarlıq layihəsinin Şuşa şəhərinin özünəməxsus arxitektura üslubuna uyğunlaşdırılması məqsədilə işçi müzakirələrin aparılması təklif olunub.
Bu xoşniyyətli təşəbbüsün məqbul görülməməsi əsla müzakirə mövzusu deyildir. Məsələnin mahiyyəti barəsində tam dolğun məruzə olunmamasının anlaşılmazlığa səbəb olduğu istisna edilməyə bilər. Əminik ki, qarşılıqlı anlaşma şəraitində texniki memarlıq xarakterli məsələlər işçi səviyyədə həll olunaraq, Üzeyir Hacıbəyli adına Şuşa incəsənət məktəbinin tezliklə inşasına başlanılacaq”, - deyə Prezidentin köməkçisi qeyd edib.
Qeyd edək ki, ötən gün axşam saatlarında Türkiyə Milliyyətçi Hərəkat Partiyasının lideri Dövlət Bahçeli öz Tvitter səhifəsində partiyasının Şuşa şəhərində məktəb tikintisi planlarından imtina etməsi barədə gözlənilməz məlumat verib. Bahçelinin sözlərinə görə, Azərbaycan rəhbərliyi Millətçi Hərəkat Partiyasının təqdim etdiyi layihəni uyğun saymayıb. Bunun əvəzinə Azərbaycanda başqa bir layihə hazırlayıblar. Dövlət Bahçeli qeyd edib ki, o və onun partiyadaşları Bakının qərarına hörmətlə yanaşıblar.
Dövlət Bahçelinin bəyanatı Azərbaycan və Türkiyədə ictimai əks-səda doğurub.
Virtualaz.org