Qarabağla bağlı üçtərəfli razılaşmaların bütün müddəalarının icrasını qeyd-şərtsiz təmin etmək lazımdır - Zaxarova

Qarabağla bağlı üçtərəfli razılaşmaların bütün müddəalarının icrasını qeyd-şərtsiz təmin etmək lazımdır.
Trend-in məlumatına görə, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
O bildirib ki, Qarabağda Rusiya sülhməramlılarının məsuliyyət zonasında hər hansı bir pozuntu qeydə alınmayıb: "Son dövrlərdə silahlı insidentlərin yaşandığı Ermənistan-Azərbaycan sərhədində vəziyyətin qiymətləndirilməsi aparılır. Biz regionda Rusiya, Azərbaycan, Ermənistan baş nazir müavinlərinin rəhbərliyi ilə üçtərəfli işçi qrupunun xətti ilə həyata keçirilən iqtisadi, nəqliyyat əlaqələrinin açılması üzrə işlər barədə müntəzəm olaraq məlumat yayırıq".
Zaxarova əlavə edib ki, hazırda Rusiya 10 noyabr 2020-ci il və 11 yanvar 2021-ci il üçtərəfli bəyanatlarının bütün müddəalarının icrasını prioritet hesab edir: "Əlbəttə, ilk növbədə, bu, atəşkəs rejiminə əməl olunması, humanitar məsələlərin həlli, regionda iqtisadi, nəqliyyat əlaqələrinin açılmasına aiddir. Ümid edirik ki, bu addımlar Azərbaycan-Ermənistan münasibətlərinin normallaşması üçün şərait yaradacaq".