• 

Oktyabrın 2-də Gürcüstanda yerli özünüidarə orqanlarına seçkilər keçirilir. Bir gün əvvəl həbs edilən ölkənin sabiq prezidenti Mixail Saakaşvili təcridxanadan tərəfdarlarına müraciət edib.
Elə seçki günü Rustavi şəhər 12 saylı cəzaçəkmə müəssisəsində olan Gürcüstanın keçmiş prezidenti Mixail Saakaşvili tərəfdarlarına məktubla müraciət edib. Bu barədə AzadlıqRadiosunun gürcü xidməti məlumat yayıb.
Məlumata görə, sözügedən məktubu Facebook səhifəsində Mtavari Arkhi telekanalının baş direktoru və Saakaşvilinin köməkçisi Nika Gvaramia yazıb. Məktubda deyilir:

“Əziz silahdaşlarım və pərəstiş etdiyim gürcü cəmiyyəti, hər şeyi Kiyevdə qoyub gələndə bilirdim ki, çox güman ki, məni həbs edəcəklər. Putinin əmri də daxil olmaqla bir vaxtlar çıxarılan tamamilə uydurma saxta hökmlərlə saxlayacaqlar. Rusiyadan başqa dünyanın heç bir ölkəsi bu hökmü tanımır. Ancaq yenə də ölkəmə və hər birinizə inandığım üçün gəldim.
Sizdən çox xahiş edərdim ki, hamınız seçki məntəgələrinə gedin, heç bir səs itirilməsin və bundan sonra hamımız birlikdə referendumun nəticələrini müdafiə edək. Mənim azadlığım və daha da önəmlisi, Gürcüstanın azadlığı tamamilə yaxın günlərdəki fəaliyyətinizdən və döyüş hazırlığınızdan asılıdır. Beynəlxalq dəstək də bundan asılıdır. Zəhmət olmasa çəkinməyin və inanın ki, qələbəmiz əlimizdədir. Mən Sizi sevirəm. Sizə sadiq Mixail Saakaşvili”. deyə məktubda vurğulanır.
Ukraynadan Gürcüstana gələn Mikheil Saakaşvili oktyabrın 1-də saxlanılıb.
Gürcüstanın hakimiyyət orqanları keçmiş prezident Mixeil Saakaşvilinin Gürcüstanda həbs olunduğunu bildirib. O özü bundan əvvəl Gürcüstanda “bələdiyyə seçkiləri ərəfəsində vətənə döndüyünü” elan etmişdi. Gürcüstanın baş naziri İrakli Qaribaşvili Saakaşvilinin Rusitavi təcridxanasında saxlandığını bildirib.
Gürcüstan Daxcili İşlər Nazirliyinin Saakaşvilinin əlləri qandallı iki polis tərəfindən aparıldığını sərgiləyən video paylaşıb.
Saakaşvilidən başqa onun qaldığı evin sahibi də saxlanılıb. Bu barədə Gürcüstan Daxili İşlər Nazirliyinin kriminal polisinin rəisi Mamuka Çelidze məlumat verib.
Saakaşvilinin qaldığı evin sahibi də saxlanılıb
Onun sözlərinə görə, Gürcüstanda axtarışda olan Saakaşvili Tbilisinin Gldani-Nadzaladevi rayonundakı mənzillərdən birində saxlanılıb.
“Alınan əməliyyat məlumatları əsasında, hüquq -mühafizə orqanlarının əməkdaşları cəmiyyətdəki qarşıdurmanı və mümkün qeyri -sabitliyin yaranmasını istisna etmək üçün Saakaşvilinin gizli saxlanılması üçün xüsusi bir əməliyyat keçirib” deyə Çelidze bildirib.
Hökumətin əleyhdarları hesab edirlər ki, vətəndaşlar saxtakarlıq halında hökumətə etimadsızlıq elan etməli və etiraz etməlidir.
Gürcüstanda məhkum edilmiş və axtarışa verilmiş ölkənin üçüncü prezidenti oktyabrın 1 -də səhər Batumidə olduğunu bildirib. Səlahiyyətlilər gün boyu Saakaşvilinin Ukraynanı tərk etmədiyini bildiriblər.
Amma axşam saatlarında Baş nazir İrakli Qaribaşvili keçmiş prezidentin artıq saxlanıldığını deyib. Bəzi məlumatlara görə, Saakaşvili saxlandığı təcridxanada aclıq aksiyasına başlayıb.