Oqtay Şirəliyev qara zolaqda

Hakimiyyətdə səhiyyə nazirinin işdən çıxarılması ilə bağlı müzakirələr gedir

Səhiyyə naziri Oqtay Şirəliyevin başı üzərində qara buludlar əsir. “Azadlıq”a daxil olan məlumatda deyilir ki, artıq Prezident Administrasiyasında Oqtay Şirəliyevlə vidalaşmaq barədə düşünürlər. Məlumatda deyilir ki, baş nazirin müavini Əli Əhmədovun da açıqlamalarında səhiyyə sahəsində nöqsanların olmasını dilə gətirməsi bununla bağlıdır.

Qeyd edək ki, hələ bir müddət əvvəl “Azadlıq” Oqtay Şirəliyevin Azərbaycan Tibb Universitetinin rektoru, deputat Əhliman Əmiraslanovla əvəzlənəcəyi barədə məlumat yaymışdı. Bildirilir ki, administrasiyada Oqtay Şirəliyevlə bağlı gedən müzakirələrdə yenə də Əhliman Əmiraslanov nazir postuna əsas namizədlərdən biri kimi göstərilir.

Oqtay Şirəliyevə gəlincə, hesab edilir ki, o, öz fəaliyyətilə ümidləri doğrultmayıb. Xüsusilə büdcə vəsaitlərinin xərclənməsi ilə bağlı səhiyyə nazirinə qarşı inamsızlıq yaranıb. “Yuxarılar” hesab edir ki, səhiyyə sahəsinə ayrılan büdcə vəsaitlərinin xərclənməsilə bağlı onlara yanlış məlumatlar verilir. Söhbət əlbəttə ki, səhiyyə sahəsində korrupsiyanın mövcudluğu ilə hakimiyyətin narahatlığından getmir. Korrupsiya bütün sahələrdə var və onun çiçəklənməsi Azərbaycan iqtidarının siyasətində prioritetdir. Söhbət pulların bölüşdürülməsi zamanı ehtimal edilən “əliəyrilik”dən gedir. Iqtidarda bununla bağlı ciddi narahatlıq var.

Hesablama Palatasının Səhiyyə Nazirliyində yoxlamalar aparması da bununla bağlıdır. Qurumun məlumatına görə, dünən kollegiya iclası keçirilib və Səhiyyə Nazirliyinə səhiyyə obyektlərinin tikintisinə və təmirinə dövlət büdcəsindən ayrılan vəsaitlərin və büdcədənkənar daxilolmaların istifadəsinə dair audit tədbirlərinin nəticələri barədə hesabat və rəylər geniş müzakirə olunub.

Məlumatlara görə, Səhiyyə Nazirliyində aparılan yoxlamaların nəticələri ürəkaçan deyil və güman ki, yaxın vaxtlarda hesabat Korrpusiyaya qarşı Mübarizə Idarəsinə göndəriləcək.

Bu arada bir maraqlı məlumatı da oxucuların diqqətinə çatdıraq. Məşhur “Bloomberg”in agentliyi ölkələr üzrə səhiyyənin reytinq cədvəlini hazırlayıb. Azərbaycan 51 ölkə arasında 49-cu yeri tutur.