Fransa Prezidenti Emmanuel Makronun Marseldə erməni diasporu ilə görüşdə səsləndirdiyi fikirlər Ermənistanda da geniş müzakirə və hakimiyyətə qarşı tənqidlərin genişlənməsinə səbəb olub.

Axar.az xəbər verir ki, Ermənistan XİN Makronun bəyanatı ilə bağlı Yelisey sarayına sorğu göndərildiyini bildirib.

“Dünəndən etibarən biz Fransa tərəfi ilə əlaqə saxlayırıq”, - XİN sözçüsü Ani Badalyan bildirib.

Qeyd edək ki, Fransa Prezidenti Makron Marseldə erməni icmasının nümayəndələri ilə görüşündə Makron Fransanın Ermənistan-Azərbaycan danışıqlarında tutduğu mövqe baxımından tək qaldığını, “Paşinyandan daha çox Əliyevə təzyiq etdiyini” bildirmişdi. Onun “tək qaldığını” bildirməsi isə Ermənistanda ciddi müzakirə doğurub.

Xatırladaq ki, bir müddət öncə Makronun 1 iyunda Kişinyovda keçirilən beştərəfli görüşdən də narazı ayrıldığı, görüşdə iştirak edən 5 liderdən 4-nün (Olaf Şolts, Şarl Mişel, İlham Əliyev, Nikol Paşinyan) Qarabağla bağlı mövqeyinin eyni olduğu, onun isə tutduğu mövqeyə görə pis vəziyyətdə qaldığını dediyi barədə məlumat yayılmışdı.