Şimali Koreya Rusiyaya 7 min konteyner silah göndərib

2023-cü ildən Şimali Koreya Rusiyaya döyüş sursatı və digər hərbi texnikanın olduğu təxminən 7 min konteyner göndərib. Bu barədə Cənubi Koreyanın müdafiə naziri Şin Von Sik məlumat verib. Onun sözlərinə görə, Şimali Koreya əvvəlcə gəmilərə güvənsə də, indi silahların çatdırılması üçün getdikcə daha çox dəmir yolundan istifadə edir. Şin Von Sik bildirib ki, Pxenyan, ehtimal, hərbi dəstək müqabilində Rusiyadan 9 min konteynerdən çox yardım alıb.

Müdafiə naziri belə bir bəyanatla Şimali Koreyanın Yapon dənizinə doğru qısamənzilli ballistik raketlər atmasından cəmi bir neçə saat sonra çıxış edib.

ABŞ və Cənubi Koreya əvvəllər də Şimali Koreyanı Ukraynadakı müharibə zamanı Rusiyaya mərmi və digər hərbi yardımlar göndərməkdə ittiham edirdi. Həm Rusiya, həm də Şimali Koreya bu ittihamları rədd edirdi.

Fevralda "The New York Times" qəzeti Rusiyanın Şimali Koreyaya döyüş sursatı müqabilində dünya maliyyə sisteminə çıxış əldə etməsinə icazə verdiyini, həmçinin Şimali Koreyanın BMT sanksiyaları altında olan bəzi aktivlərini blokdan çıxardığını yazmışdı.