Gəncədə “Bala nazir” ləqəbli Anar Abdullayev kimdir?

Gəncə DYPŞ-də rüşvətalma prosesinə təhlükəyə qarşı "parol 38” rejimi tətbiq olunub

Dövlət Yol Polisinin fəaliyyəti haqda hər gün mediada yeni məlumatlar yayılır. Bu dəfə isə Gəncə Şəhər Baş Polis İdarəsinin Dövlət Yol Polis Şöbəsində baş verən qanunsuzluqlar üzə çıxıb. Gələn xəbərlərə görə, Gəncədə kim avtoxuliqanlıq etmək istəyirsə, bununla bağlı sadəcə Gəncə ŞBPİ-nin DYPŞ-nin rəis müavini polis kapitanı Şabanov Raminə müraciət edib ayda 250 manat pul ödəmək kifayətdir. Yox, əgər peşəkar avtoxuliqansansa, 350 manat ödəməlisən.
Onu da bildirək ki, Ramin Şabanov Gəncə ŞBPİ-nin rəisi Faiq Şabanovun doğmaca qardaşı oğlu, həm də kürəkənidir. Mötəbər mənbə bildirir ki, saytımızda dərc olunan yazı Gəncədə ciddi reaksiya doğurub. Belə ki, yazının dərcindən sonra Gəncə DYPŞ-də rüşvətalma məsələsi müvəqqəti olaraq dondurulub. Hətta təşvişə düşən Ramin Şabanov maraqlı metoda əl atıb. Bu barədə bizimlə söhbətində adının çəkilməsini istəməyən Gəncə DYPŞ-nin əməkdaşı bildirdi ki, şərti adı "parol 38” olan qaydaya görə rüşvətalma prosesində təhlükə hiss edən kimi "parol 38” işə düşür və xəbərdarlıq edir.
Apardığımız araşdırma zamanı məlum oldu ki, Gəncə DYPŞ-də Ramin Şabanovun Anar adlı sürücüsü var. Anar Gəncədə 20- BO -010 nömrəli Range Rover CİP-də gəzir. Əslən gəncəli olan bu şəxs şəhərə yaxşı bələd olduğu üçün Ramin Şabanovu məlumatlandırır, həm də avtoxuliqanlardan pulu yığıb "ağa”sına çatdırır. Onu da bildirək ki, Anar Gəncədə həkim ailəsində böyüyüb, Texnologiya İnstitutunu bitirib, əsas işi dərman preparatlarının satışı və paylanması olub. Üstündə TAKSI (şahmat) işarəsi olan şəxsi VAZ 2107-si ilə dərman sataraq yaxşı pullar əldə edib.
Hətta sonuncu dəfə DİN-in Baş Narkotiklərlə Mübarizə İdarəsinin Gəncə şəhərində keçirtdiyi əməliyyat - axtarış tədbirləri nəticəsində saxlanılıb. Ancaq sonradan onun həkim valideyinlərinin işə müdaxiləsindən sonra o sərbəst buraxılıb. Sonra valideyinləri belə qərara gəliblər ki, Anarı polis sisteminə işə düzəltsinlər. Anar da hazırda Ramin Şababovun yanında özünü polis sistemində sınayır. Həm də Ramin Şabanovun təkcə sürücüsü kimi deyil, kassiri kimi də çalışır. Elə Gəncədəki avtoşlara da Anar xəbər verib ki, mətbuatda Gəncə DYPŞ ilə bağlı yazılar dərc olunduğu üçün "fövqəladə rejimə-parol 38”-ə keçmişik.
Hazırda Gəncədə avtoşların dişi bağırsağını kəsir və "parol 38”-in ləğv olunacağı günü səbrsizliklə gözləyirlər. Onu da qeyd edək ki, Gəncədə 20 -BO -010 nömrəli Range Rover sürdüyünə görə Anara "Bala Nazir” ləqəbi veriblər(qafqaznews.az ).
Bizi izləyin araşdırmamız davam edir. Qarşı tərəfin mövqeyini işıqlandırmağa hazırıq.