Xədicə İsmayıl həbsdən də araşdırma materialı göndərdi

"Rusiya bataqlığında batan həm də bizim pullarımızdır”

“Azərbaycan rəhbərliyi demokratiyanın əleyhinə seçim edir və bu, həm də rejim nümayəndələri üçün yanlış seçimdir”

Həbsdə olan jurnalist Xədicə İsmayıl son gönlər baş verənlərlə bağlı öz fikirlərini əməkdaşlıq etdiyi “Azadlıq” radiosuna çatdırıb və radio qısa fikirləri birləşdirib yazı halında təqdim edib:

“Azadlıq Radiosu barədə xəbərləri həbsxanada həyəcanla izləyirəm. Ümid edirəm, həmkarlarım ruhdan düşməyib, möhkəmdirlər.


Azadlıq Radiosu soyuq müharibə dövründə üzləşdiyi rəftarla üzləşir. Təəccüblü deyil. Bu gün Azərbaycan rəhbərliyi modernizmin, azad sözün, demokratiyanın əleyhinə seçim edir. Bu, təkcə bizim üçün yox, həm də rejim nümayəndələrinin özü üçün yanlış seçimdir. Təqribən ay yarım bundan əvvəl, Rusiya kanalına müsahibə verərkən İlham Əliyev fəxrlə Azərbaycanın Rusiya iqtisadiyyatına yatırım qoyduğunu – VTB bankının qiymətli kağızlarını aldığını deyirdi. Əslində bu yatırım Əliyev ailəsinin həmin bankın səhmdarı olması ilə də əlaqədar idi. VTB bankın səhmlərinin ATA Holdinq və Panama şirkəti vasitəsilə Əliyevlərə məxsus olduğunu xarici mətbuat da yazıb, biz də yazmışıq.

Bu günlərdə senzuradan yayınan bir xəbər TV-də səsləndi: Neft Fondu VTB bankın qiymətli kağızlarına yatırdığı sərmayədən 400 milyon dollar əvəzinə 50 milyon dollardan bir qədər artıq gəlir götürəcək. Yəni itki 350 milyon dollardır (fins.az-ın xəbəri idi). Deməli, Rusiya iqtisadiyyatı çökür, ardınca ona bel bağlayanları da çökdürür. Təəssüf ki, Rusiya bataqlığında batan həm də bizim pullarımızdır. Neft Fondunun Əliyevlərin Rusiyapərəst kaprizlərinə xərclədiyi pullar əslində gələcək nəslin idi.

Azadlıq Radiosu bu həqiqətləri söylədiyi üçün susdurulmağa çalışıldı. Amma susmayacaq. Müasir dünyada susdurmaq asan deyil. Bu gün hər kəs Azadlıq Radiosu, hər kəs doğru söz carçısı ola bilər. Bu imkandan yararlanmaq vaxtıdır!

Mənə atılan daşlardan ev tikməyin tərəfdarı olmuşam hər zaman. Bu gün hər kəsin məsuliyyətini dərk etməsi üçün gözəl imkandır.

Radionu hər hansı maliyyə və ya vergi cinayətində günahlandırmaq absurddur. Bu nağıllara heç kim inanmır. Şahvələd Çobanoğluna da heç bir ləkə yapışdırmaq mümkün olmayacaq. Azərbaycanın ən vicdanlı insanlarından birinə qara yaxmağa çalışırlar. Rejim get-gedə absurdun dibinə yuvarlanır, amma ən əsası, Şahvələd bəy, İntiqam bəy kimi insanları məhz müxalif olduqlarına, vicdan nümunəsi göstərildiklərinə görə həbs etdiyini etiraf etməyə qorxur.

Azadlıq radiosundakı həmkarlarıma. Mənim əzizlərim, möhkəm olun! Heyf ki, yanınızda deyiləm, çətinliklərə sinə gərməkdə yardımçı ola bilmirəm. Əminəm ki, bu sınaq iradəmizi daha da möhkəmləndirir.

Azadlıq Radosunun azad sözü çatdıran, fərqli düşüncəyə yer verən, doğru xəbər yayan hər bir kəsin, qurumun bu rejim tərəfindən basqıya qalması normaldır. Təbiidir.

Biz, hər bir durumda Azərbaycan insanına və bəşəriyyətə xidmətimizi davam etdirməliyik. Bütün mümkün vasitələrlə! Sizi çox sevirəm. Sizinlə bir komandada olmaq şərəfdir.

Azad söz və fərqli düşüncəni boğmaq mümkün olmayacaq!