Daha bir prezident parada qatılmır: Liderlər Putindən üz döndərdi

Bolqarıstan prezidenti Rosen Plevneliev də Moskvada Böyük Vətən Müharibəsinin 70 illiyinə həsr olunacaq tədbirlərdə iştirakdan imtina edib.

“Qafqazinfo” xəbər verir ki, Bolqarıstan prezidentinin mətbuat xidməti dəvəti aldıqlarını, lakin prezidentin mərasimlərdə iştirak etməyi planlaşdırmadığını bəyan edib. Prezidentin getməməyinin səbəbi isə açıqlanmır.

Qeyd edək ki, daha əvvəl Almaniya kansleri Angela Merkel, Avropa Şurasının sədri Donald Tusk, Polşa prezidenti Bronislav Komorovskiy, Litva, Latviya, Estoniya prezidentləri də tədbirlərə qatılmaqdan imtina etmişdilər.

Alman kanslerin isə paraddan bir gün sonra Rusiyaya səfər edəcəyi gözlənilir. Merkelin mətbuat katibi bildirib ki, kansler Rusiyanın Krımla bağlı mövqeyi və Ukraynanın şərqindəki situasiyaya görə parada qatılmaqdan imtina edir.

9 May paradında Britaniyanın baş naziri Devid Kameron da iştirak etməyəcək. Fransa prezidenti isə hələ ki, dəqiq cavab verməyib.

Ötən ilin dekabrında ABŞ prezidentinin Kremlin dəvətindən imtina etməsi ilə bağlı xəbərlər yayılsa da, daha sonra Ağ Ev bəyanat yayaraq yekun qərarı qəbul etmədiklərini bildirmişdi.