Moskvadakı “Bakı bulvarı” restoranında atışma: 4 nəfər yaralanıb

Moskvadakı “Bakı bulvarı” restoranında müştərilər arasında yaranan mübahisə atışma ilə nəticələnib.

Neverovski küçəsində yerləşən restorandakı insident mayın 27-dən 28-nə keçən gecə saat 1 radələrində baş verib. Münaqişə zamanı 4 nəfər – R Mustafayev, R.Bayramov, M.Ramazanov və A.Maqomedov müxtəlif dərəcəli xəsarət alıblar. Onların hamısı Sklifosovski xəstəxanasına yerləşdiriliblər.

İlkin məlumata görə, atəş odlu silahdan açılıb. Polis hadisə yerində araşdırma aparır, insidentin hansı səbəbdən baş verdiyi dəqiqləşdirilir.

Şahidlərdən birinin sözlərinə görə, atışma restorandan kənarda da olub. Küçədə qara geyimli naməlum şəxslər fəal şəkildə atışıblar. (Modern.az)