“Bu cür davam edəcəklərsə, mən də susmayacam”

Sabiq deputat Gülər Əhmədovanın Bakı Dövlət Universitetinin (BDU) müəllimi vəzifəsindən azad olunduğu haqda xəbər yayılıb.

Gülər Əhmədova haqqında yayılan xəbərə belə reaksiya verib.

“Çox təəssüflə qeyd etmək istəyirəm ki, bilmirəm hansı şəxsin, yaxud hansı qüvvənin təsiri altında başıma gələn məlum xoşagəlməz hadisədən sonra uzun müddətdir ki, haqqımda yalan informasiyalar yayırlar. Nə yazıq ki, bəzi mətbu orqanlar hələ bu gün də köhnə əməllərini yerə qoymayıblar. Vaxtilə ağalarının onlara verdiyi sifarişi yenə yerinə yetirirlər. Mənim haqqımda köhnə informasiyaları yeni informasiya kimi təqdim eləməyə çalışırlar. Unutmasınlar ki, onların ağaları ağalıq statusunu çoxdan itirib. Böyük əminlikə inandırıram ki, mənə qarşı etdikləri növbəti təxribatlara görə artıq heç kim onlara “çox sağ ol” deməyəcək. Hətta, maliyyə paylarını da artırmayacaq. Ona görə bu əməllərini yerə qoysunlar. Tövbə etsinlər! Ayıbdı!

Mən Bakı Dövlət Universitetinə getmişəm ki, məni işdən çıxartsınlar da?! Bu sentyabrdan işə çıxmamışam. Mən ərizəmi o vaxt yazmışam. Şər-böhtan maşınını qurtarın! Ölkədə gedən proseslərə baxın! Ağıllı olun!”.

Gülər Əhmədova bundan sonra haqqında yayılan informasiyaları cavabsız qoymayacağını da deyib.

“Düzü, istəməzdim ki, mənə qarşı fitnə-fəsadın içində olam. Mənə qarşı olan hansısa jurnalistlərin adını çəkmək istəmirdim. Bu cür davam edəcəklərsə, mən susmayacam”.

Modern.az