Paşazadələrin şəriki ədalət istəyir: “Sifarişlə həbs olunduğumu hamı bilir”

Paşazadələrin şəriki növbəti dəfə hakim qarşısına çıxarılıb. Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən prosesdə Paşazadələrin şəriki olmuş Müğdət Həşimov məhkəmədən ədalət istəyib. O, başına gətirilənlərin ədalətli şəkildə araşdırılmasını istəyib.

Musavat.com-un məhkəmə prosesində iştirak edən müxbiri xəbər verir ki, təqsirləndirilən Müğdət Həşimov məhkəmədə öz vəkilindən imtina etdiyini bildirib.

M.Həşimov bu addımını belə əsaslandırıb ki, vəkili onu qane etmir və müdafiəçisi olduğu şəxsin fəaliyyətindən narazıdır.

Hakim Novruz Kərimov isə bunun gecikmiş addım olduğunu və vaxtında edilməli olduğunu xatırladıb: “Siz məhkəmə yekunlaşdığı ərəfədə belə bir istəklə çıxış edirsiniz. Əgər belə bir fikriniz var idisə, vaxtında niyə etmirdiniz?”.

“Sifarişlə həbs olunduğumu hamı bilir”


M.Həşimov: “Möhtərəm hakim, mən aylardır günahsız yerə həbsdəyəm. Bir az vicdanı olan insan bilir ki, mənim günahım yoxdur. Sifarişlə həbs olunduğumu hamı bilir”.

Hakim: “Sizin vəkiliniz ən savadlı və mənim də hörmət etdiyim vəkillərdən biridir”.

M.Həşimov: “Cənab hakim, siz deyirsiniz ki, vəkilim savadlıdır və siz də ona hörmət edirsiniz. Ancaq 6 vəsatət qaldırsa da, heç biri təmin olunmadı”.

Hakim: “Məhkəmədə vəsatətlər hörmətə görə təmin olunmur”.

“100 il cəza verin, çıxım gedim”


M.Həşimov: “Bəs mən nə edim? 100 il cəza verin, çıxım gedim. Haqlı olduğumu hər kəs bilir. Günhasız yerə, sifarişlə həbs edilmişəm, işimə də bu şəkildə baxılır”.

Hakim: “Məhkəməyə heç kim sifariş verə bilməz. Bu işə qanun necə icazə verirsə, o şəkildə də baxılır və baxılacaq”.

M.Həşimov: “Əgər qanun olsaydı, mən burda olmazdım”.

“Hacı Mazan deyir ki, Müğdət bizim dustağımızdır”



Hacı Mazan

Məhkəmə zalında olan M.Həşimovun bacısı da dialoqa qoşulub. O, qardaşının günahsız olduğunu və bu işin günahkarlarından birinin də şeyxin qardaşı Cavanşir Paşazadənin işlərini görən Hacı Mazanın olduğunu deyib: “Cənab hakim, Hacı Mazan deyir ki, Müğdət bizim dustağımızdır. Belə şey olar? Belə ədalətsizlik olar? Biz istəyirik ki, sülh, barışıq olsun. Qardaşımın 60 yaşı var. Özü də xətədir, övladı da. Axı niyə digər tərəf məhkəmədə iştirak etmir? Onları bura niyə gətirmirlər?”.


Müdafiə tərəfinin vəkili isə Müğdət Həşimovun vəkilindən imtina etməsini vaxt qazanmaq üçün atılan addım olduğunu deyib və əlavə edib: “Bu anda vəkil dəyişmək yalnız vaxtı uzatmaq üçündür. Ona bu imkan yaradılsın, görək bundan sonar nə olacaq”.

Hakim M.Həşimovun vəkilindən imtina etməsinin hüququ olduğunu deyib və ona bu imkanı yaradıb. M.Həşimovun yaxınları qısa zaman ərzində yeni vəkillə müqavilə imzalanacağını deyiblər.

Həşimovla Paşazadələrin şərikliyi necə başladı?


Bəs, Müğdət Həşimovu dəmir barmaqlıqlar arxasına salan şəriklik nədir? Necə oldu ki, bir göz qırpımında Paşazadələrlə şərik olan M.Həşimov elə bir göz qırpımında da həbsə düşdü?

Bu haqda “Yeni Müsavat” qəzetində geniş məlumatlar dərc edilib. Həmin yazılara istinadın Həşimov və Paşazadələr arasında şərikliyin qısa olaraq xatırladırıq.

M.Həşimov Allahşükür Paşazadənin qardaşı, deputat Cavanşir Paşazadənin və onların ailə üzvləri ilə şərik olub. M.Həşimov deyir ki, onun həbsi Paşazadələri sifarişi ilə həyata keçirilib.

Paşazadələrlə Həşimov tibb müəssisəsində şərik olublar. 2 ilə yaxın davam edən şəriklik 59 yaşlı Həşimovun sonuncu işi olub.

O, 12 avqust 2015-ci ildə Cinayət Məcəlləsinin 179.3.2-ci (mənimsəmə) maddəsi ilə təqsirli bilinərək həbs olunub. Sonradan onun barəsində 178.3.2 (dələduzluq) və 213.1(vergidən yayınma) maddələri ilə də ittiham irəli sürülüb.

Paşazadənin qızı, kürəkəni, həyat yoldaşı…


M.Həşimov deputat C.Paşazadənin himayəsində olan “Aygün-C” MMC-nin təsisçiləri ilə 2012-ci ilin 6 dekabrında rəsmi qaydada “Birgə fəaliyyət haqda” müqavilə bağlayıb. Müqavilənin şərtlərinə görə onunla iş birliyində Allahşükür Paşazadənin həyat yoldaşı və oğlu, Cavanşir Paşazadənin qızı və kürəkəni olub.

M.Həşimov şərikli açılan klinikadan 193 min 50 manatlıq tibbi avadanlığın çatışmazlığına görə təqsiləndirilir.

Qeyd edək ki, tərəflər arasında şərikliyin şərti belə olub ki, təsisçilər Bank “VTB”dən 700 min manat götürüb M.Həşimova veriblər. Həmin pulun banka qaytarılması isə 2018-ci ilə qədər M.Həşimovun öhdəliyində olub. Həşimov klinikadan qazandığı pulla həmin borcu ödəməli imiş. Bankın pulu ödənilib bitdikdən sonra əldə olunan qazanc Cavanşir Paşazadə ilə Həşimov arasında bölünməli imiş.


Klinika C.Paşazadənin adına olan 1255 kv.metrlik qeyri-yaşayış sahəsində açılıb.

Həşimov peşimançılığı...


Bu şəriklik əsasında M.Həşimov “Medi-Sina” MMC-nin təsisçisi olub və fəaliyyətə başlayıb.
Lakin sonra bu şəriklik Müğdət Həşimovun da anlaya bilmədiyi səbəbdən bitib. Cavanşir Paşazadə və onun adamı Hacı Mazan ləqəbli Ramazan Zeynalov klinikaya gələrək, M.Həşimovdan tələb ediblər ki, müəsissə boşaldılasın. Bununla da şəriklik birib, klinika bağlanıb, M.Həşinmov isə bir neçə ay sonra həbs olunub.

İlkin Muradov
Musavat.com