Avropada hamam xalatı satdıran Azərbaycanın məşhur məmuru ilə bağlı yeni məlumatlar üzə çıxıb. Criminal.az saytı xəbər verir ki, Qida Təhlükəsizliyi Agentliyinin rəhbəri Qoşqar Təhməzlidən gedir.

Jurnalist Cavanşir Həsənli yazır ki, ukraynalı xanım Svitlana Palamarchuk Qida Təhlükəsizliyi Agentliyinin rəhbəri Qoşqar Təhməzlinin Slovakiya və Ukraynadakı şirkətlərinin meneceri və kompanyonudur: "Qoşqar Təhməzli hər iki ölkədə hamam tekstili və aksessuarları satan "Saffran"ın 20 faizini onun adına rəsmiləşdirib. Adam ciddi vəzifə tutur, ölkənin ərzaq təhlükəsizliyi ona həvalə olunub". 

 

Həmin sənədlər üzə çıxandan sonra Qoşqar Təhməzli xarici ölkələrdə biznes şəbəkəsinin olması ilə bağlı məlumatlara aydınlıq gətirib. Təhməzli mətbuata açıqlamasında sahibkarlıq fəaliyyəti ilə məşğul olması barədə yazılanlarda hər hansı bir problem görmədiyini deyib: 

"Mən, cənab Prezidentin fərmanı ilə bu vəzifəyə təyin olunmuşam. Bu vəzifəyə təyin olunmamışdan 15 il öncə isə sahibkarlıq fəaliyyəti ilə məşğul olmuşam. Mən beynəlxalq bizneslə məşğulam. Özüm də ixtisasca həkiməm. Nəinki sadalanan ölkələrdə, digər ölkələrdə də tibbi innovasiyalarla, tibbi layihələrin tətbiqi ilə, tibbi sektorda müəssisələrin qurulması ilə, labarotoriyaların təchiz olunması ilə, lal-kar uşaqların reabilitasiya məsələləri ilə məşğul olmuşam, o cümlədən də Avropada. Bu barədə də rəsmi məlumatlar gedib. Mən 2017-ci ilə qədər iş adamı olmuşam, bununla da fəxr edirəm. Dünyanın bir sıra ölkələrində iri şirkətlərin təmsilçisi olmuşam. İş adamı olmaq qəbahətdir? Eyni zamanda, Qarabağ müharibəsi veteranıyam. Qarabağda sağlamlığını itirmiş qardaşlarımızın reabilitasiyasına kömək etmişəm. Bu işlərdə bir qəbahət varmı? Mənim təyinatım olanda rəsmi məlumat getmişdi ki, illərdir özəl bizneslə məşğul olmuşam. Mən fəxr edirəm ki, öz əməyim və zəhmətimlə biznes sahəsində, tibbi sahələrdə öz işimi qurmuşam”. 

criminal.az