TÜRKİYƏNİN SURİYA ƏMƏLİYYATI:Avropa Birliyinin başına endirilən zərbə - Təhlil

Ergün Diler

“Takvim”, Türkiyə, 15 oktyabr 2019-cu il

ABŞ, Türkiyə, AB, Rusiya və Çin səhnədədir.

Türk dövlətinin Suriyadakı yürüşü öz təməli etibarilə YPG/PKK-İŞİD mərkəzli olsa da, əsil zərər görən, silinib gedəcək olan özünü yeniləyə bilməyən, Ankaranı 1960-cı illərdən bəri qapıda gözlədən Avropa Birliyi olacaqdır.

Kürd kartı Avropanın tamamının, həm də uzun illərdən bəri, sərmayə qoyduğu bir sahə idi. “PKK ilə nəticə almadılar” deyə bilmərik. Çox çalışdılar. Can yandırdılar. Guya, NATO-da bir yerdə idik, lakin quyumuzu qazanlar elə eyni təşkilatda olan “dost” ölkələr idi.

Türkiyənin sərhəddi keçməsi ilk dəfə deyil. Türk əsgəri İraq və Suriyaya çox girib, vəzifəsini yerinə yetirərək geri dönüb. Neçə gündür ki, elə bunu anlatmağa çalışıram.

İndi 30 briqadanın iştirakı ilə həyata keçirilən hərbi hərəkat böyük bir əməliyyat olmaqla bərabər, gözdağıdır. Kimə? Avropaya.

Türkiyə bu saatdan sonra o bölgəyə tam nəzarət edəcək. Modeli yaxında görəcəyik. Bunu ya orada hərbçiləri saxlayaraq, ya da suriyalıları ora göndərib, onlar vasitəsilə hakimiyyət quraraq edəcəkdir. Bu “türk düyünü” Avropanın bütün paytaxtlarının yuxusunu qaçırıb. Üstümüzə pulla da, silah embarqosu ilə də, təhdidlə də gəlirlər. Ancaq nəticə alma ehtimalları heç yoxdur. Doğrusu, AB-nin ən kiçik üzvü olan Lüksemburq ən böyük sözü söyləyirdi: “Həqiqətlərdən danışaq, insanları aldatmayaq. Türkiyəni bölgədə durduracaq gücümüz yoxdur…”

Eyni saatlarda ÇXR sədri Şi Cinpinq də sərt danışırdı, ad çəkmədən ABŞ-a hücum edərək, “Bizi bölmək istəyənlərin bədənini çeynəyər, sümüklərini əzərik” deyirdi.

Türkiyənin Suriyaya budəfəki girişinin öncəkilərə bənzəmədiyini hər kəs görürdü. Yeni dünya nizamı Türkiyənin çiyinlərində, “Mehmetcik”in süngüsündə yüksəlirdi. İlk itirən qəti olaraq Avropa olacaqdır. İngiltərənin nə edəcəyini görəcəyik. Ancaq əsil uduzanın Avropa olacağı aydındır.

ABŞ-Türkiyə-Rusiya ittifaqı Çini də məhdudlaşdıracaqdır.

NATO əsla əvvəlki kimi olmayacaq. Ya dağılacaq, ya da başqa bir şəkil alacaq. Buna da Türkiyənin keçirdiyi əməliyyat yol açacaq.

Cefri Epşteyn hadisəsindən sonra ABŞ bir anda böyük addımlar atmağa başladı. Sanki arxa planda öz aralarında bir “əlsıxma” vardır. Ancaq “twit”lərə baxıb, “ABŞ Türkiyəyə qarşı sanksiya tətbiq edəcək” gözləntisi içinə girməyin. Bunu edənlər yanılar, böyük yalnışlığa düşərlər. Sanksiya tətbiqi planları olsaydı, Rotşildlərin ən güvəndiyi şəxs olan Uilbur Ross (ABŞ Ticarət naziri – tərc.) gəlib 5 gün Türkiyədə qalmazdı. Çinə qarşı atılacaq addımları dizayn edən və həyata keçirən Rossun ziyarəti haqında çox danışılmadı, lakin böyük önəm daşımaqda idi. Sanksiya haqqında düşünən ağıl 100 milyard dollarla (ABŞ-Türkiyə ticarət dövriyyəsinin 100 milyard dollara çatdırılması hədəfi – tərc.) Ankaranın qapısını döyməzdi. Hətta hərəkat üçün kəşfiyyat informasiyası yağdırmazdı…

Tramp hər kəsi yayındırır, fikirləri qarışdırırdı. Əraziyə baxdıqda isə, ABŞ hərbçiləri bölgəni bizə təslim edir, qurduğu obyektləri də təsirsiz hala gətirirdi.

Elə tam bu mərhələdə sancı başladı, Avropanın kəşfiyyat təşkilatları dövrəyə girdi. Məqsədləri ABŞ-Türkiyə-Rusiya ittifaqını pozmaqdır.

Təhlil göstərir ki, sonunda Avropa sakitcə enişə keçəcəkdir. Lakin qəbul etmək istəməyəcəklər, üstümüzə gələcəklər. Ala biləcəkləri heç bir şey olmasa da, gələcəklər. Kəşfiyyat savaşlarına start veriləcək. Lakin qalib gələn Türkiyə olacaq. Çünki onu durduracaq gücləri yoxdur…

Qeyd: İndi Türkiyənin hərbi hərəkatına şiddətlə qarşı çıxan BBC, 2017-ci ildə İŞİD-in Rakkadan ABŞ-YPG əməkdaşlığı ilə çıxarıldığını bütün dünyaya çatdırmışdı. Bölgəni dəyişmək üçün həmin gün düyməyə basılmışdı. Savaş da o gün elan edilmişdi.

Tərcümə Strateq.az-ındır