Azərbaycanlı sürücü Türkiyədə "mərifət"ini göstərdi - FOTO

Bahalı avtomobili səkidə park edən sürücünün hərəkəti türkləri əsəbləşdirib

Bakıdan Türkiyəyə gedən sürücü burada özünü əməlli-başlı "göstərib". Daha doğrusu, qayda pozuntusu ilə insanların diqqətini çəkib və Azərbaycanın adını orada da pis mənada hallandırıb. avtosfer.az-a oxucular tərəfindən göndərilən fotodan aydın olur ki, İstanbulun Aksaray adlanan ərazisində Azərbaycana məxsus "BMW-X-6" markalı, 90 HN 888 dövlət nömrə nişanlı avtomobil dayanma-durma qaydalarını kobud şəkildə pozub. Görünür, özünü Bakıdakı kimi hiss edən sürücü avtomobili səkiyə çıxarıb və orada park edib.

Fotonu saytımıza göndərən oxucunun bildirdiyinə görə, Bakıdan gələn sürücünün bu hərəkəti ətrafdakı insanlar tərəfindən pis qarşılanıb və türklər "azəri sürücülər həmişə belədir" deyə keçib gediblər.

Fotoya diqqətlə baxdıqda məlum olur ki, səkidə bu maşından başqa, heç kim park etməyib. Maşınlar yalnız yolun solunda dayanıb. Görünür, bizim sürücülük mədəniyyətimizin inkişafı üçün uzun zaman lazım olacaq. O ki qaldı bu avtomobilə, onun həm özü, həm də nömrəsi bahalıdır. Belə avtomobillə Türkiyəyə getmək isə hər adamın işi deyil. Görünür, pulu çoxdur deyə Bakıda elədiklərini Türkiyədə də təkrarlayır. Arada isə türk qardaşlarımız arasında Azərbaycan sürücüləri haqqında pis fikir formalaşır. Adamın varı, dövləti çox olanda nə olar ki? Mütləqdirmi ki, belə xoşagəlməz əməllərlə özün bir yana, ölkəmizin adına ləkə gətirəsən?