Bakupost.az-ın məlumatına görə, peşəkar və bir o qədər də qətiyyətli kadr kimi tanınan Eyvazovun keçmiş nazirin kadrları ilə işləməyə davam edəcəyi, yoxsa özünün komandasını formalaşdıracağı sualı öz vacib cavabını gözləyir. 

 

Yeni nazir bu sistemdə uzun illər ikinci şəxs kimi çalışdığı və keçmiş nazir Ramil Usubovun əsas kadrı olduğundan nazirlikdə ciddi dəyişiklik ediləcəyi gözlənilmir. Amma müəyyən yüksək vəzifələrdə yerdəyişmələrin ediləcəyi də iddialar arasındadır. 

 

BakuPost-a daxil olan məlumata görə, Vilayət Eyvazov ilk növbədə Usubovun "illərin xətrinə görə” toxunmadığı, yaşı 60-dan çox olan kadrlara "əl gəzdirəcək”. 

 

 

Yeni nazirin islahatlara yol polis sistemindən başlayacağı bildirilir. Belə ki, bu barədə redaksiyamızı məlumatlandıran qaynağın sözlərinə görə, son illərdə polis orqanlarının nüfuzuna ən çox xələl gətirən sahə kimi adı çəkilən yol polisində islahatların həyata keçirilməsi əsas hədəflərdən biridir. 

Bildirilir ki, mətbuatda Daxili İşlər Nazirliyi və  polis sistemi ilə bağlı yazılan tənqidi materialların böyük əksəriyyəti məhz yol polisinin fəaliyyəti ilə bağlı olur. Bu isə polisin imicinə xələl gətirən problemlərdən biri kimi qiymətləndirilir. Yeni nazir Vilayət Eyvazov da məhz bu amili nəzərə alaraq, yol polisi sistemində dəyişikliyə getmək, yol polisinin fəaliyyətindəki qüsurları ən qısa müddətdə həll edərək, DİN-in nüfuzuna neqativ təsir edən səbəbləri aradan qaldırmağı prioritet görür. 

Məlumata görə, 25 ildir Baş Dövlət Yol Polisi İdarəsinin rəisi postunu tutan Ramiz Zeynalovla vidalaşmaq yeni nazirin qarşısındakı duran əsas işlərdəndir. Mənbə deyir ki, 1994-cü ildə Ramil Usubovun Daxili İşlər naziri təyin edilməsindən bir neçə ay sonra bu posta gətirilən və artıq 25 ildir, keçmiş nazirlə işləyən R.Zeynalovun vəzifədən uzaqlaşdırılmasının hüququ zəmini də var. DYP rəisi yaş senzi ilə əlaqədar tutduğu postdan ayrılacaq və təqaüdə göndəriləcək. 

Bəllidir ki, Dövlət Yol Polisi İdarəsinin rəisi Ramiz Zeynalovun təqaüd vaxtıdır. Ona görə də onun yaxın günlərdə pensiyaya göndəriləcəyi şübhəsizdir. Ramiz Zeynalovun 1994-cü ildən bəri Ramil Usubovla birlikdə işlədiyini də nəzərə alsaq, yaş senzini keçməsinə və təqaüd yaşında olmasına rəğmən onun tutduğu postdan niyə uzaqlaşdırılmadığını anlamaq mümkündür. 

 

Eyni zamanda, Bakı Şəhər Yol Polisi İdarəsinin rəisi, Ramiz Zeynalovun əsas kadrı Nuşirəvan Səfərovun da yaş senzi ilə bağlı təqaüdə yollanacağı bildirilir. Artıq 10 ilə yaxındır, Bakıda yol polisinin rəhbəri vəzifəsini daşıyan Səfərovun da təqaüd vaxtıdır.

Qeyd edək ki, nazir V.Eyvazov birinci müavin kimi  DİN-də müstəsna səlahiyyətlərə malik olsa da, yol polisi ilə bağlı məsələlər birbaşa Ramil Usubovun nəzarətində olub. Ona görə də yeni nazirin bu postlara öz adamlarını gətirəcəyi iddia etmək əsassız olmaz. 

Yeni nazirin bu dəyişiklikləri ilin sonuna qədər bitirəcəyi və yeni ilə özünün yeni komandası ilə başlayacağı qeyd edilir.