Azərbaycanda dövlət qurumunun binası satılıb – 650 min manata

“Yeni Sabah” xəbər verir ki, bu haqda məlumatı Azpolitika.info yayıb. Xəbədə görə, sonuncu dəfə belə bir “əməliyyat” «Azərpoçt» MMC-nin paytaxtdakı 2 saylı filialının 138 saylı poçt şöbəsində həyata keçirilib: 

““Azərpoçt”un təkcə Bakı şəhərində 100-dən artıq şöbəsi fəaliyyət göstərir. Sovet dövründə əksər binaların birinci mərtəbəsini başdan-başa əhatə edən poçt şöbələrinin çoxunun ərazisi ya satılıb, ya da kiçildilərək balaca bir otağa çevrilib. Məsələn, “İnşaatçılar” metrosunun yaxınlığında yerləşən 138 saylı Poçt Şöbəsinin də sahəsi satılıb. Şöbəyə əvvəlcə ATS-in binasında, sonra isə yeni açılan “Şəbəkə” xidmət mərkəzində yer verməklə kifayətləniblər”.

Qeyd edilir ki, həmin şöbənin yerləşdiyi əmlak “Azərpoçt”un rəhbərliyi tərəfindən satılıb: “100 kv.metrdən çox sahəsi olan poçt şöbəsi “Azərpoçt” rəhbərliyi tərəfindən 650 min manata satılıb. Ən maraqlısı odur ki, “Azərpoçt”un baş direktoru poçt şöbələrini satır, sonra da yeni sahibindən baha qiymətə icarəyə götürür…”

Mənbə qurumun rəhbəri Emin Əfəndiyevin hətta nazirlə də hesablaşmadığını iddia edir: “Maraqlı məqamlardan biri odur ki, baş direktor ya özü həddindən artıq sərbəst adamdır, ya da onun üçün bu cür sərbəstliyi yaradanlar var. Çünki o, hətta nazir Ramin Quluzadənin belə sözünə məhəl qoymur…”