Kannda yarışacaq filmimizin treyleri

Azərbaycan kinosu tarixində ilk dəfə olaraq 67-ci Kann Beynəlxalq Kinofestivalının əsas müsabiqə proqramlarından biri olan "Qısa metr" proqramına daxil edilən "Sonuncu" qısametrajlı bədii filminin treyleri yayımlanıb. Mədəniyyət və Turizm Nazirliyinin sifarişi ilə C.Cabbarlı adına "Azərbaycanfilm" kinostudiyası və "Buta Films" şirkətininin birgə istehsal etdikləri filmin quruluşçu rejissoru Sergey Pikalov, ssenari müəllifləri Sergey Pikalov, Aleksandr Krasavin, quruluşçu operatoru Denis Madışev, quruluşçu rəssamı Əziz Məmmədov, prodüserləri Mariya İvanova, Nəsib Piriyev, Müşfiq Hətəmovdur. İkinci dünya müharibəsinin veteranı barədə fəlsəfi və ibrətamiz hekayəni tamaşaçıya nəql edən filmdə İdris Rüstəmov və Corc Qafarov çəkiliblər. Qeyd edək ki, "Qısa metr" proqramının münsiflər heyətinin sədri dünya şöhrətli İran kinorejissoru Abbas Kiarostamidir. Xatırladaq ki, bundan başqa Elmar İmanovun (“Tabutçunun yelləncəyi” – tələbə Oskarı, 2012) və Engin Kundağın (“Ararat” – Berlinale, 2012) birgə işi olan “Torn” filmi Kann festivalının “Rejissor həftəliyi” proqramına salınıb.
[media=http://www.youtube.com/watch?v=h8HZ8L5BSAA]