Sizin Reklam Burada
Tel: 050 378-66-61 E-mail: [email protected]

"Şimal ayısı" Azərbaycan üçün təhlükədir? - ŞƏRH

10-06-2022, 13:04   


"Şimal ayısı" Azərbaycan üçün təhlükədir? - ŞƏRH


Dünən Putin gənc alim və iş adamları ilə görüşüb, özünü 1-ci Pyotrla müqaisə edib, böyük ölkə olmağın torpaqların genişləndirilməsindən (faktiki işğaldan) keçdiyini deyib, suverenliyin əsasını, böyüklüyün təməlini ərazi ilə ölçüb. 

Cebhe.info xəbər verir ki, bu sözləri "Respublikaçı Alternativ" (REAL) partiyasının icra katibi Natiq Cəfərli deyib:

“Bir sözlə, tipik İmperiya düşüncəsidir, belə yanaşmanın bütün postsovet məkanı üçün təhlükə olduğunu göstərir. Bu gün orta statistik rusiyalı elə Putindir, əhalinin böyük əksəriyyəti də eyni belə düşünür, çünki elə “proqramlaşdırılıblar”, böyük ölkə olmağın, “İmperiya” modelinin iqtisadiyyat və əhalinin rifahı olduğunu qəbul etmək istəmirlər. 

Torpaqların artması heç də ölkənin rifahı, inkişafı demək deyil, müasir “İmperiya” tipi, məsələn, Cənubi Koreyadır. Gəlin kiçik bir müqayisə aparaq: 

1. 1991-ci ildə SSRİ dağlıb Rusiya müstəqil olan ildə Rusiyanın ÜDM-i 517 mlrd. dollar idi, sonra kəskin düşdü. 1996-cı ildə cəmi 396 mlrd. dollar oldu. Eyni dövrdə, 1991-ci ildə Cənubi Koreyanın ÜDM-i 367 mlrd. dollar idi, 1996-cı ildə isə 597 mlrd. dollar oldu.

2. Sonrakı dövrlərdə Rusiyanın ÜDM-i artmağa başladı. 2021-ci ildə ölkənin ÜDM-i 1 trilyon 780 milyard dollar olub. Həmin il Cənubi Koreyanın ÜDM-i isə 1 trilyon 800 milyard dollar olub.

3. 2021-ci ilin məlumatlarına görə, Rusiyanın əhalisi 145 mln. 557 min nəfərdir, adambaşına düşən ÜDM isə 12200 dollar olub. Həmin dövrə Cənubi Koreyanın əhalisi 51 mln. 780 min nəfər olub, adambaşına düşən ÜDM isə 34865 dollar olub. Adambaşına düşən ÜDM-ə görə Rusiya Cənubi Koreyadan 3 dəfə geridədir.

4. 2021-ci ildə Rusiyanın ixracı 491 mlrd. 600 mln dollar olub ki, bunun da 60%-ə yaxını neft-qazdır. Həmin il Cənubi Koreyanın ixracı 644 mlrd. 540 mln. dollar olub ki, bunun da tamamı real sektor, texnoloji məhsullardır.

5. Bu qədər resursa rəğmən sanksiyalardan öncə Rusiyanın qızıl-valyuta ehtiyatları 630 mlrd. dollar idi, indi 300 mlrd. dolları “dondurulub”. Cənubi Koreyanın qızıl-valyuta ehtiyatları isə 452 mlrd. 300 mln. dollardır".

Natiq Cəfərli qeyd edib ki, əslində Rusiya bədbəxt ölkədir, bu qədər resurslara, əraziyə rəğmən böyük ölkə ola bilmir, İmperiyanı ərazi ilə ölçür, normal sistemi olsaydı Rusiya indi ABŞ-dan da 5 dəfə yaxşı yaşamalı, varlı və nüfuzlu ölkə olmalı idi:

“Cənubi Koreyanın ərazisi Rusiyadan 170 dəfə, əhalisi 3 dəfə azdır, amma əsl müasir “İmperiyadır”, torpaqları yox, bazarları tutur, ərazini deyil də, əhalinin qarajlarını, ciblərini, evlərini “işğal” edir.

Nə qədər ki, orta statistik Rusiya vətəndaşı elə Putin kimi olacaq, nə qədər ki, imperiya olmağın formulunu ərazi genişliyi ilə ölçəcək, bizə, qonşulara, postsovet ölkələrinə təhlükə həmişə qalacaq. Ona görə də Azərbaycan öz “de-yure” və “de-fakto” ittifaqlarını genişlədib möhkəmləndirməli,qardaş Türkiyə ilə inteqrasiya müqavilələri dərinləşdirilməlidir.

Şimalda həmişə Ayı olub, bu gün isə yaralı Ayı var, yaralı və ağlını itirmiş Ayı..”

Cebhe.info
 

Facebook-da paylaş
Digər xəbərlər
Xəbərlər
Bütün xəbərlər
Ən çox oxunanlar