2022-ci il ərzində müvafiq Dövlət reyestrində ixtiralara dair 108 ədəd patent qeydiyyata alınıb, onlardan 84 ədədi milli, 24 ədədi isə xarici hüquqi şəxslərə məxsusdur. 

Bu barədə Əqli Mülkiyyət Agentliyindən Cebhe.info-nun sorğusuna cavab olaraq bildirilib.

Məlumata görə, faydalı modellərə dair 2022-ci il ərzində 31 ədəd patent qeydiyyata alınıb, onlardan 21 ədədi milli, 10 ədədi isə xarici hüquqi şəxslərə məxsus olub: 

"Sənaye nümunələrinə dair 22 patent və 2927 ədəd əmtəə nişanı qeydiyyata alınıb. Coğrafi göstəricilərin Dövlət reyestrində milli hüquqi şəxslərə məxsus 2 ədəd coğrafi göstərici qeydiyyata alınıb". 

Agentliyin məlumatında son illər qeydiyyata alınan patentlər arasında ən diqqət çəkən ixtiraların tibb sahəsinə aid olduğu qeyd edilib:

"Çevirici stabilizator”, “Təsbitedici vint elementlərinin fəqərələrdə quraşdırılması üçün cərrahlıq dəsti”, “Burun boşluğunda əməliyyatlar zamanı tikişlərin qoyulması üçün alət” və “Ortopedik stomotologiyada çıxan protezlərdə elastik diş qarniturları”dır. “Çevirici stabilizator” - 25 ilə 400 volt arasında dəyişən qeyri-sabit şəbəkə gərginliyindən (45 ilə 680 volt arasında - xətt gərginliyi) 230 (380) volt 50 herts sabit bir gərginliyi təmin etmək və şəbəkədəki reaktiv komponentlərin tamamilə aradan qaldırılması üçün nəzərdə tutulub. “Təsbitedici vint elementlərinin fəqərələrdə quraşdırılması üçün cərrahlıq dəsti” - vint əməliyyat zamanı beyin zədələnməsinin qarşısını alır. Cərrahlıq dəsti istehsal olunub və praktikada istifadə edilib. 

“Burun boşluğunda əməliyyatlar zamanı tikişlərin qoyulması üçün alət” – burun boşluğunda əməliyyatlar zamanı tikişlərin qoyulması üçün istifadə olunur. “Ortopedik stomotologiyada çıxan protezlərdə elastik diş qarniturları” - ortopedik stamotologiya sahəsində tətbiq olunur. Əsasən çıxan protezlərdə istifadə olunur. Protez üzərində dişlər fərdi olaraq sərbəst amortizasiya funksiyasını yerinə yetirir və bu, məhsulun əsas üstünlüyü hesab olunur". 

Günay Şahmar
Cebhe.info