Rəşad Dağlı özünü qismən təqsirli bildi - TƏFƏRRÜAT

Bakı Ağır Cinayətlər Məhkəməsində məşhur meyxanaçı Rəşad Dağlının (Əmirov) cinayət işi üzrə məhkəmə prosesi keçirilib.

Musavat.com xəbər verir ki, hakim Leyla Əsgərova-Məmmədovanın sədrliyi ilə baş tutan prosesdə prokuror Orxan Səmədov ittiham aktını elan edib.

İttihama münasibət bildirən Rəşad Dağlı özünü qismən təqsirli bilib. O, soyuq silah gəzdirməkdə özünü təqsirli bilməyib. Deyib ki, şahidlərin dindirilməsi başa çatdıqdan sonra sərbəst ifadə verəcək.

Hakimlər isə qərara gəliblər ki, proses zərərçəkmiş şəxsin hüquqi varisinin dindirilməsi ilə davam etdirilsin. Prosesdə zərərçəkmiş şəxsin hüquqi varisi, qardaşı Etibar Mehdiyev də iştirak edib. O, təqsirləndirilən şəxsə qarşı şikayəti olmadığını deyib.

İttihama görə, ötən il noyabrın 9-da, saat 05 radələrində 1979-cu il təvəllüdlü İskəndər Mehdiyevin öldürülməsi barədə rayon prokurorluğuna məlumat daxil olub. Aparılmış araşdırmalarla zərərçəkmişin tanışı, 1984-cü il təvəllüdlü Rəşad Əmirovun şəxsi münasibətlər zəminində aralarında yaranmış münaqişə zamanı bıçaqla çoxsaylı xəsarətlər yetirərək İskəndər Mehdiyevi qəsdən öldürməsinə əsaslı şübhələr müəyyən edilib. Rəşad Əmirov şübhəli şəxs qismində tutularaq istintaqa cəlb edilib.

Rəşad Dağlının qətlə yetirdiyi şəxslə bağlı bəzi məqamlar üzə çıxıb. Meyxanaçının bıçaqladığı 1979-cu il təvəllüdlü İskəndər Mehdiyev xeyli vaxt həbsxanada olub. Hadisəyə isə İskəndərin Rəşad Dağlının arxasınca söyüş söyməsi səbəb olub.

Rəşad Dağlı İskəndərlə məsələyə aydınlıq gətirmək üçün onu görüşə çağırıb və noyabrın 9-da, səhər saat 05 radələrində hər iki şəxs Lökbatan qəsəbəsində görüşüblər. Şəxsi münasibətlər zəminində baş vermiş münaqişə zamanı Rəşad Dağlı İskəndəri bıçaqlayaraq öldürüb.

Qeyd edək ki, Rəşad Dağlının qətlə yetirdiyi İskəndər Mehdiyev Cinayət Məcəlləsinin 234.4.3 (külli miqdarda narkotik vasitələrin qanunsuz dövriyyəsi) maddəsi ilə uzun müddət həbsdə olub. O, hadisədən təxminən 15 gün əvvəl cəzasını başa vuraraq azadlığa buraxılıb. İskəndər Mehdiyev azadlığa buraxıldıqdan sonra dəfələrlə Rəşad Dağlıya zəng vuraraq onunla mübahisə edib.

Rəşad Əmirov Cinayət Məcəlləsinin 120.1-ci (qəsdən adam öldürmə) maddəsi ilə ittiham olunur. Rəşad Dağlıya Cinayət Məcəlləsinin 228.4-cü (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə) maddəsi ilə də ittiham verilib.

E.Məmmədəliyev,
Musavat.com