Baş nazir hökumətlə bağlı məsələlər barədə onu məlumatlandırmaq üçün, adətən, çərşənbə günləri Kralla Buckingham sarayında görüşür.

Bu görüşlər qapalı şəraitdə keçirilir və oradakı müzakirələrlə bağlı heç bir rəsmi qeyd tutulmur.

Kralın, həmçinin parlamentdə bir sıra rəsmi vəzifələri var:

• Hökumətin təyin edilməsi - ümumi seçkilərdə qalib gələn partiyanın lideri, adətən, Buckingham sarayına dəvət edilir və burada ona hökuməti formalaşdırmaq təklif olunur. Kral, həmçinin ümumi seçkilər ərəfəsində hökuməti rəsmi olaraq buraxır.
• Dövlət Açılışı və Kralın Nitqi - Kral parlament ilinə Dövlət Açılış mərasimi ilə start verir. Bu mərasim çərçivəsində Kral Lordlar Palatasında taxtından etdiyi çıxışında hökumətin planlarını bəyan edir.
• Kral Təsdiqi - qanun layihəsi Parlamentdə təsdiqdən keçdikdən sonra onun qanuna çevrilməsi üçün Kral tərəfindən də rəsmi şəkildə təsdiqlənməlidir. Kral Təsdiqinin verilməməsi sonuncu dəfə1708-ci ildə qeydə alınıb.

Bundan əlavə, monarx noyabr ayında Londondakı Cenotaph abidəsi önündə illik Anım mərasiminə rəhbərlik edir.

Kral, həmçinin ölkəyə səfər edən dövlət başçılarını - misal üçün, Cənubi Afrika Respublikasının Prezidenti Cyril Ramaphosa kimi başçıları - qəbul edir və mütəmadi olaraq, Böyük Britaniyada yerləşən xarici səfirlər və ali komissarlarla görüşür.

İlk dövlət səfəri çərçivəsində Charles Almaniyaya baş çəkib və Almaniya parlamentində çıxış edən ilk Britaniya monarxı olub.

Kral, eyni zamanda ümumilikdə 2,5 milyard əhalisi və tərkibində 56 müstəqil ölkə olan Britaniya Millətlər Birliyinin rəhbəridir. Həmin ölkələrdən Birliyin krallıqları kimi tanınan 14 ölkəninsə həm də dövlət başçısıdır.

Kraliça Konsort Camilla Krala onun işlərində kömək edir və dəstəklədiyi 90 xeyriyyə təşkilatı adından özü də ictimai tədbirlər keçirir.

Təşkilatların bir çoxu sağlamlıq və rifah məsələləriylə məşğul olur və zorlama və ya cinsi təcavüzə məruz qalan insanlarla işləyir.

Tacqoyma mərasimində nə olacaq?

Westminster Abbey-də keçiriləcək mərasim zamanı tacqoyma ritualında Kral Kraliça Konsort ilə birlikdə iştirak edəcək.

Tacqoyma, Canterbury Arxiyepiskopu tərəfindən keçirilən Anqlikan kilsəsinin dini ayinidir. Monarx "müqəddəs yağ" ilə məsh edilir, ona krallığın rəmzləri olan kürə və hökmdarlıq əsası verilir.

Mərasimin kulminasiya nöqtəsində Arxiyepiskop 1661-ci ildə tökmə qızıldan hazırlanmış Müqəddəs Edvard Tacını Charles-in başına taxacaq.

Bu, Krallığın Londonun Tower qəsrindəki ləl-cəvahiratının əsas əşyasıdır və monarx onu yalnız tacqoyma mərasimi zamanı taxır.

Kral toylarından fərqli olaraq, tacqoyma dövlət tədbiridir - hökumət bunun üçün pul ödəyir və qonaqların siyahısını da son nəticədə elə hökumət müəyyənləşdirir.

Kral ailəsində daha kimlər var?

• Şahzadə William Kral Charles-ın və onun birinci həyat yoldaşı, mərhum Şahzadə Diana-nın böyük oğludur. Kraliçanın ölümündən sonra o, Cambridge Hersoqu titulunu saxlamaqla yanaşı Uels Şahzadəsi və Cornwall Hersoqu olub. O, Uels Şahzadəsi və Cornwall və Cambridge hersoginyası Catherine ilə evlidir. Onların üç övladı var: Şahzadə George, Şahzadə Charlotte və Şahzadə Louis.
• Kraliyyət Şahzadəsi (Şahzadə Anne) Kraliçanın ikinci övladı və yeganə qızı idi. O, vitse-admiral Timothy Laurence ilə evlidir. İlk əri kapitan Mark Phillips-dən iki övladı var: Peter Phillips və Zara Tindall
• Edinburgh Hersoqu (Şahzadə Edward) Kraliçanın ən kiçik övladı idi. Edinburgh Hersoginyası (Sophie Rhys-Jones) ilə evlidir. Onların iki övladı var: Ledi Louise Windsor və Wessex Qrafı (James Mountbatten-Windsor)
• York Hersoqu (Şahzadə Andrew) Kraliçanın ikinci oğlu idi. Onun keçmiş həyat yoldaşı York Hersoginyasından (Sarah Ferguson) iki qızı var: Şahzadə Beatrice və Şahzadə Eugenie. Şahzadə Andrew 2019-cu ildə Virginia Giuffre-yə cinsi təcavüz etdiyi iddiaları ilə bağlı mübahisəli BBC Newsnight müsahibəsindən sonra "kraliyyətin fəaliyyətdə olan nümayəndəsi" statusundan istefa verib. 2022-ci ilin fevralında o, ABŞ-da xanım Guiffre-nin ona qarşı qaldırdığı cinsi təcavüz iddiası ilə bağlı mülki işi həll etmək üçün açıqlanmayan məbləğdə pul ödəyib.
• Sussex Hersoqu (Şahzadə Harry) William-ın kiçik qardaşıdır. O, Sussex Hersoginyası (Meghan Markle) ilə evlidir. Onların iki övladı var: Şahzadə Archie və Şahzadə Lilibet. 2020-ci ildə onlar kral ailəsinin öncül üzvləri statusundan imtina etdiklərini və Kaliforniyaya köçdüklərini açıqlayıblar.

Varislik necə işləyir?

Vərəsəlik qaydası Kral ailəsinin hansı üzvünün mövcud monarx öldüyü və ya taxt-tacdan imtina etdiyi zaman yeni monarx kimi onun yerinə keçəcəyini müəyyən edir. Taxtın varisi kimi növbədə, birinci yerdə monarxın yaşca ən böyük övladı durur.

2013-cü ildə kral varisliyi qaydalarına edilmiş düzəlişlərə əsasən, kral övladları arasında gender bərabərliyi təsbit edilib, yəni taxt-taca növbədə oğulun ondan yaşda böyük olan bacısı qarşısında üstünlüyü ləğv edilib.

Kral Charles-ın varisi onun böyük oğlu Uels şahzadəsidir. William-ın böyük oğlu Şahzadə George taxt-taca növbədə ikinci, qızı Şahzadə Charlotta isə üçüncüdür. Şahzadə Louis dördüncü, Şahzadə Harry isə beşincidir.

Kral ailəsi nə qədər populyardır?

Tacqoyma mərasimi ərəfəsində ictimai əhval-ruhiyyəni qiymətləndirmək üçün BBC-nin Panorama proqramı YouGov agentliyinə yeni rəy sorğusu sifariş edib.

Sorğunun nəticəsi əhali arasında monarxiyanın qorunmasına geniş dəstəyin olduğunu göstərib: monarxiyanı respondentlərin 58 faizi dəstəklədiyi halda, dövlət başçısının seçki yoluyla müəyyən edilməsinə respondentlərin cəmi 26 faizi dəstək verib.

Ancaq, eyni zamanda, sorğu bu mövzuya münasibətdə müxtəlif yaş qruplarında vəziyyətin nə qədər fərqli olduğunu da östərib. Xüsusilə gənclər üçün monarxiyanın cazibəli görünməsi problemli olub..

Misal üçün, yaşı 65-dən yuxarı olan respondentlər arasında monarxiyanı dəstəkləyənlər 78 faiz təşkil edibsə, 18-24 yaş arasında respondentlər arasında monarxiyanı cəmi 32 faiz dəstəkləyib. Bu yaş qrupundan respondentlərin 38 faizi seçki yoluyla müəyyən edilən dövlət başçısına üstünlük verib. Qalan 30 faiz isə kimə üstünlük verəcəklərini "bilmədiklərini" söyləyiblər.

Ümumilikdə isə gənc respondentlərin əksər hissəsi Kral ailəsiylə maraqlanmadıqlarını bildiriblər: bu məsələyə laqeyd qalan gənc respondentlər 78 faiz təşkil edib.

Kral ailəsi harda yaşayır?

Kral Charles və Kraliça Konsort Camilla Buckingham sarayında yaşayırlar. Əvvəllər onlar Londondakı Clarence House və Gloucestershire-dəki Highgrove-da yaşayıblar.

Digər kral iqamətgahlarına Windsor Qəsri, Norfolkdakı Sandringham, Edinburgh-dakı Holyroodhouse Sarayı və Aberdeenshire-dəki Balmoral Qəsri aiddir.

2022-ci ilin avqust ayında Uels Şahzadəsi William və Şahzadə Catherine Londonun qərbindəki Kensington sarayından Windzor Estate mülkünə daxil olan Adelaide kottecinə köçüblər.