“Qərbin, xüsusilə ABŞ və Fransanın Ermənistanı Azərbaycana qarşı təxribatlara təhrik etməkdə əsas hədəfi öz məqsədlərinə nail olmaqdır”. 

Bu sözləri politoloq Elşən Manafov Cebhe.info-ya açıqlamasında ABŞ və Avropa İttifaqının Azərbaycanla Ermənistan arasında son gərgin proseslərə münasibətini şərh edərkən bildirib. Onun sözlərinə görə, ABŞ-ın əsas məqsədi Cənubi Qafqaz uğrunda geosiyasi rəqabətdə Rusiyanı regiondan sıxışdırıb çıxartmaq və Moskvanın Ermənistan üzərində təsir imkanlarını minumuma endirməkdir. 

“Qərbin Azərbaycana təzyiqləri ölkəmizin Ermənistandan fərqli olaraq müstəqil xarici siyasət yürütməsinə görədir. Ermənistanda sorosçuların və Rotşildlərin təmsilçisi olan Nikol Paşinyan onların maraqlarına xidmət etdiyi halda, Azərbaycanın dövlət rəhbəri İlham Əliyev dövlət siyasəti və dövlət strategiyasını məhz ölkənin təhlükəsizlik maraqlarına əsasən həyata keçirir. Bu, Qərb tərəfindən xoş qarşılanmır. Eyni zamanda, Qərb Azərbaycanı Qarabağda erməni separatçıları ilə danışıqlar aparmağa sövq edir. Halbuki Qərb dövlətləri heç bir zaman özünün təhlükəsizliyini təhdid edən separatçılar və terrorçu ünsürlərlə danışıqlar aparmayıb.

Bununla bərabər, Ermənistandan fərqli olaraq Azərbaycan Qərbin təhlükəsizlik sisteminə inteqrasiya ilə bağlı prosesin süni şəkildə sürətləndirilməsində maraqlı deyil. Əlbəttə, söhbət əsasən NATO barədə gedir. Azərbaycan regionla bağlı müəyyən geosiyasi problemlər kontekstindən hərəkət edir. Nəzərə almaq lazımdır ki, Azərbaycan hərbi-siyasi bloklara qoşulmayan dövlətlərin birliyində təmsil olunur. Qərbin Azərbaycan üzərində təzyiqlərində bu amil xüsusi yer tutur. Bu məsələdə digər amil isə Azərbaycanın Rusiya ilə münasibətləridir”. 

O xatırlaıdb ki, Qərbin israrlı mövqeyinə baxmayaraq, Azərbaycan, eləcə də Türkiyə Rusiyaya qarşı tətbiq olunan sanksiyalara qoşulmayıb: 

“Azərbaycan Rusiya ilə yüksək səviyyədə münasibətlər qurub. Azərbaycan Rusiya üçün xüusi əhəmiyyət daşıyan logistik mərkəzə çevrilib. Həmçinin, Azərbaycan çox yaxşı bilir ki, Qərblə müqayisədə Rusiya Qarabağ probleminin həllində daha çox təsir imkanlara malikdir. Bildiyimiz kimi, rus sülhməramlıları Qarabağ bölgəsində vəziyyətə nəzarət edirlər. Sadaladığım bu amillər Qərbin Azərbaycana təzyiqlərinin artmasına gətirib çıxarır”. 

Yunis Abdullayev
Cebhe.info