Qərbin Ermənistan üzərindən yeni HİYLƏSİ - Son açıqlamaların SENSASİON SƏBƏBİ

Qərb yenə Ermənistandan yana “narahatlıq” keçirir. Bu “qeydə qalma” bu ərəfələr raket sürəti götürüb. Bu dəfə Avropa İttifaqı (Aİ) hərəkətə keçib. Belə ki, Aİ “Azərbaycandan gələn təhlükəyə cavab olaraq” Ermənistandakı missiyasını genişləndirə bilər. 

“Narahatlıq kampaniyası”na erməni lobbisinin diktəsi ilə hərəkət edən ABŞ-ın dövlət katibi Entoni Blinken start verdi. Belə ki, “Politico” nəşri məlumat yaymışdı ki, ABŞ dövlət katibi Entoni Blinken xəbərdarlıq edib ki, Azərbaycan yaxın həftələrdə Ermənistana hücum edə bilər. Lakin çox keçmədən ABŞ Dövlət Departamenti Blinkenin dediklərini təkzib etdi.

“Birləşmiş Ştatlar Ermənistanın suverenliyini və ərazi bütövlüyünü qətiyyətlə dəstəkləyir. Biz vurğulamışıq ki, bu suverenliyin və ərazi bütövlüyünün istənilən şəkildə pozulması ciddi nəticələrə gətirib çıxaracaq. Bu məqalədəki məlumat qeyri-dəqiqdir və katib Blinkenin qanunvericilərə dediklərini heç bir şəkildə əks etdirmir”, - deyə ABŞ Dövlət Departamentinin yaydığı açıqlamada qeyd olunub.

Entoni Blinkenin sözləri təkzib olunsa da, son baş verənlər açıq şəkildə göstərir ki, Qərbin məqsədi həmişə olduğu kimi, məkrlidir. Hər zaman ayağı dəyən yerləri qan yuvasına çevirən Qərb dairələri bu dəfə Ermənistanı, Cənubi Qafqazı seçiblər. Guya Azərbaycan Ermənistana hücum edərsə, onu “qorumaq” kimi niyyətlərini önə çəkərək əslində bu ərazidə daimi yerləşmək arzusundadırlar və missiyalarının burada uzun müddət qalmasını istəyirlər.

Bu yalançı panika ilə həm Ermənistan əhalisini qorxudurlar, real təhlükə olduğuna inandırırlar ki, onlar Qərbin hərbi missiyasına hamılıqla razılaşsınlar, həm də dünya ictimaiyyətində rəy formalaşdırmaq istəyirlər ki, “biz erməniləri xilas etmək üçün orada olmalıyıq”.

Azərbaycan dəfələrlə bəyan edib ki, bölgədə sülhün tərəfindədir və apardığı antiterror tədbirləri ilə bunu sübut edir. Azərbaycan hər zaman beynəlxalq hüquq normalarına əməl edir, yalnız işğal altında olan torpaqlarının azad olunması uğrunda haqlı savaşa qalxır. Ermənistan isə uzun illərdir təcavüzkar siyasət yürütməsinə baxmayaraq, Qərb dairələri İrəvanın “hüquqlarını” müdafiə etmək adı ilə müxtəlif oyunlar qururlar. Biz bunu 30 il ərzində Ermənistanın icazəsi olmadığı üçün işğal olunmuş ərazilərə girə bilməyən BMT-nin timsalında görürük. Həmin BMT ki, 30 ildən sonra bizim ərazilərdə insan hüquqlarından danışır. Ancaq bu illər ərzində bizim 1 milyondan çox qaçqınımızın hüquqları bir dəfə də olsun, yada düşmədi. İşğal altında olan ərazilərimizdə erməni vandallarının dağıtdığı abidələrin siyahısı belə aparılmadı.

Bütün bunlar Ermənistan hökumətini heç də narahat etmir. Çünki Ermənistan hökuməti hər zaman maşa olub. Bir zamanlar Rusiyanın, son zamanlar Fransanın, daha əvvəllər digər ölkələrin yedəyində getməyə öyrəşib. İndi də Avropaya, qərblilərə sığınmaqla guya özünü ağ günə çıxartmaq istəyir. Əslində isə özünü daha asılı duruma, Qərbin tapdağı altına saldığının fərqində deyil.

Mövzuya münasibət bildirən politoloq İlyas Hüseynov Musavat.com-a deyib ki, əvvəllər Ermənistanı müdafiə hərəkətləri daha çox siyasi sahədə, diplomatik müstəvidə müşahidə olunurdusa, son dövrlər həm də hərbi və təhlükəsizlik sahəsinə keçid etmək istəyirlər:

“Bu, əlbəttə ki, regional təhlükəsizlik nöqteyi-nəzərdən mühüm təhdidlər formalaşdırır. ABŞ dövlət katibi Entoni Blinken xəbərdarlıq etmişdi ki, Azərbaycan Ermənistanın cənub hissəsinə müdaxilə etmək niyyəti güdür. Daha sonra bu fikirlər təkzib olundu və bu cür məlumatların tanınmış bir nəşrdə dərc edilmədiyinə dair məlumatlar paylaşıldı. Ardınca biz görürük ki, Avropa İttifaqının Ermənistanda olan heç də mülki xarakter daşımayan missiyasının fəaliyyətini daha da gücləndirmək, burada xidmət edən insanların sayını artırmaq və texniki təchizatı icra etmək niyyətində də fikirlər ifadə olunur. Bu, siyasi spekulyasiyadır, yalanların tirajlanması və geniş xarakter almasına cəhdlər kimi dəyərləndirilir.

Bu işin arxasında əlbəttə ki, Ermənistanı silahlandırmaq niyyəti durur. Onsuz da Fransa Ermənistana öz hərbi dəstəyini ifadə etmək üçün dəfələrlə bəyanatlarla çıxış edib.

Bu narrativə ABŞ və Avropa İttifaqının qatılması da yolverilməzdir. Biz anlayırıq ki, Fransa Avropa İttifaqında önəmli dövlətlərdən, böyük güclərdən biridir. Lakin bu gücü heç də Ermənistanın silahlandırılması ilə regional sülhü pozmaq, təhlükəsizliyə təhdid formalaşdırmaq naminə istifadə etməməlidir. Fransa Cənubi Qafqazda siyasi nizamı pozmamalıdır. Fransa əlində olan alətlərdən, Aİ, BMT Təhlükəsizlik Şurasından istifadə etməklə ölkəmizə qarşı geniş kampaniyanı həm də hərbi seqmentə daşımamalıdır. Bu cür cəhdlər əlbəttə ki, yolverilməzdir və iflasa uğrayacaq.

Azərbaycanın Ermənistana hücum etmək niyyəti yoxdur. Azərbaycan sülh, sabitlik və təhlükəsizliyin tərəfdarıdır. Biz müharibə və eskalasiya niyyəti güdmürük. Bu cür şayiələr əlbəttə ki, siyasi təxribatdan başqa bir şey deyil”.

Aytən Novruz
Musavat.com