“Eleven Park” “Pilot 16″ Bakını mərkəzində belə bina inşa edir-Təhlükəli vəziyyət-Fotolar

Bakıda BMT-nin İqlim dəyişikliyi konfransı COP-29-un keçirilməsinə sayılı günlər qalır. Noyabrda paytaxta azı 80 min qonaq gələcəyi gözlənilir. İqlim dəyişikliyi ilə bağlı toplaşan hökumət başçıları, prezidentlər, ekoloqlar, bu sahə üzrə vətəndaş cəmiyyəti üzvləri qlobal problemi müzakirə edəcəklər. Lakin COP 29 keçiriləcək şəhərdə iqlimə, ekologiyaya, təbiətə zərər vuranlar da az deyil.

Onlardan biri Bakının Nəsimi rayonunun Novruzov qardaşları və Cəlil Məmmədquluzadə küçələrində “Elevan Park” yaşayış kompleksi inşa edən qalmaqallı “Pilot 16” MMC-dir.

Bu barədə Editor.az ərazidə yaşayan sakinlər məlumat verib. Yerli sakinlərin sözlərinə görə, şirkətin insanların faktiki yaşadığı evlərin bir neçə metrliyində apardığı ağır tikinti, betonlama, katlavan işlərinin ətrafa vurduğu ekoloji zərər insanların birbaşa sağlamlığına mənfi təsir edir. Tikinti, betonlama və katlavan qazma işləri zamanı havaya qalxan dəhşətli toz-tozanaq, ümumən çirkli hava insanların nəfəsliyinə, ciyərlərinə gedir. Sakinlər bildirirlər ki, “Pilot 16” ucbatından olan illərdir ki, dəhşətli natəmiz hava udurlar. Bu da ciddi xəstəliklərin törəməsi təhlükəsi yaradır. Xüsusən də astma, ağciyər və digər tənəffüs xəstəlikləri olanlar və körpələr üçün ciddi təhdid mənbəyi sayılır.

Bundan başqa şirkətin sökdüyü evlərin ərazisi tam bir xarabalığı və zibilliyi xatırladır. Üfunət iyindən və zibillikdən ərazidən keçmək mümkün deyil. Sakinlər qeyd edir ki, dəfələrlə müraciət etmələrinə baxmayaraq, şirkət öz qanunsuz əməllərinə davam edir.

Bundan başqa şirkətin fəaliyyəti nəticəsində sakinlərin və avtomobillərin istifadəsinə olan yollar tamamilə sıradan çıxıb, istifadəyə yararsız hala düşüb. Şirkətin intensiv yolun bir hissəsini qazaraq, tikinti işləri aparması maşınlar üçün əsl təhlükə və qəza mənbəyidir.

Sakinlər Ekologiya və Təbii sərvətlər nazirliyi və Bakı şəhər İcra Hakimiyyətindən ərazidə yaranmış dəhşətli və biabırçı vəziyyəti nəzarətə götürməyi xahiş edir: “COP 29 tədbirinin keçiriləcəyi şəhərimizə belə vəziyyət yaraşmır”.

Qeyd edək ki, “Pilot 16” MMC-nin rəsmi direktoru Aslan Quliyevdir. Lakin mediada yayılan və təkzib olunmayan xəbərlərə görə, şirkətin əsl sahibi keçmiş oliqarx-deputat Əsabil Qasımov və onun ailə üzvləridir.