Bakıda ər arvadını "Odnoklassniki"yə görə öldürdü

Ötən gün 12:15-də Bakının Yasamal rayonunda baş verən dəhşətli qətlin təfərrüatları məlum olub. Yasamal rayon Polis İdarəsindən anspress-ə verilən məlumata görə, H.Zərdabi küçəsi 71, mənzil 176-da yaşayan 1978-ci il təvəllüdlü Dilavər Nadir oğlu Əhmədov həyat yoldaşı, 1989-cu il təvəllüdlü Günay Eldar qızı Əhmədovanı boğaraq qətlə yetirib. Daha sonra Dilavər Əhmədov polisə zəng vuraraq arvadını öldürməsi barədə məlumat verib. Hadisə yerinə gələn hüquq-mühafizə orqanları Dilavər Əhmədovu tutub. Qadının meyiti isə tibbi ekspertizaya verilib. Araşdırmalar zamanı 36 yaşlı Dilavər Əhmədovun keçmiş polis işçisi olduğu məlum olub. Hadisə şahidləri isə baş verən qətlə səbəb olan məsələni danışıblar. Deyilənlərə görə, Əhmədovlar ailəsinin 3 övladı var. Əvvəllər onlar normal dolanıblar. Ərlə arvadın arasında hər hansı bir mübahisə eşidilməyib. Lakin sonradan Günay Əhmədova bir müddət əvvəl sosial şəbəkədə, daha dəqiq “Odnoklassniki”də olarkən əvvəllər tanıdığı bir nəfəri tapıb. Deyilənlərə görə, qadının tapdığı kişi əvvəllər onun sevgilisi olub. Keçmiş tanışını tapan qadın sonradan onunla yenidən münasibət qurub. Bir müddət sonra Dilavər Əhmədov məsələdən hali olub. Bundan sonra cütlük arasında mübahisə yaranıb. Əsəblərini cilovlaya bilməyən ər özündən 11 yaş kiçik arvadını boğaraq qətlə yetirib. Faktı Yasamal rayon Prokurorluğu araşdırır.
----------10:17
Bakıda dəhşətli qətl hadisəsi törədilib. Yasamal rayonu, Həsən bəy Zərdabi küçəsində yaşayan 36 yaşlı Dilavər Əhmədov özündən 11 yaş kiçik həyat yoldaşı Günay Əhmədovanı boğaraq öldürüb. Dilavər Əhmədov sonra könüllü olaraq polisə gələrək təslim olub.