Zığ limanına gətirilən neftçilər xəstəxanaya aparıldı VIDEO

Xilas edilmiş neftçilər artıq Zığ limanına gətirilib.

Virtualaz.org saytının əldə etdiyi məlumata görə, təcili yardım maşınları yaralıları dərhal xəstəxanalara aparıb.

Xəstə yaxınlarının sözlərinə görə, 5 təcili tibbi yardım maşını ilə 10 xəstə Mərkəzi Neftçilər Xəstəxanasına aparılıb. Neftçilərin yaxınlarına xəstəxanaya getmək tövsiyə olunub. Lakin xəstəxananın qarşısına toplaşan xəstə yaxınlarına məlumat verilmir. Xəstəxanadan deyiblər ki, onlara bu haqda məlumat vermək qadağası qoyulub.

Xəsarət almayan digər neftçilər isə xüsusi avtobuslara mindirilərək limandan aparılıb.

Səhiyyə Nazirliyi mətbuat xidmətinin rəhbəri Liliya Bayramova virtualaz.org saytına açıqlamasında hələlik 5 saylı yanıq mərkəzuinə gətirilənlərin olmadığını deyib.

* * *19:02

“Günəşli” neft platformasının qəza baş vermiş 10-cu özülündə iş növbəsində olan neftçilərin yaxınları bu dəqiqələrdə Zığ limanında toplaşaraq xilas edilmiş şəxslərin gətirilməsini gözləyir. Onlara verilən məlumata görə, gəmi bu limana yan alacaq.

Virtualaz.org saytının müxbiri hadisə yerindən xəbər verir ki, limanın giriş qapısı qarşısında yüzlərlə adam toplaşıb, lakin onlar içəri buraxılmır. Ərazi ciddi polis nəzarəti altındadır. Neft Şirkətinin mühafizəçiləri də limana girişi qoruyur.

Limanın qarşısına toplaşanlardan biri virtualaz.org saytının müxbirinə deyib ki, limanın həyətində bir neçə təcili tibbi yardım maşını və həkim briqadaları hazır vəziyyətdə gözləyir.

Ülviyyə

Virtualaz.org