Öldürülən jurnalistin işi ilə bağlı şok gəlişmələr...

Ekspertizanın rəyi həkimləri necə xilas etdi? həbs müddəti başa çatmaq üzrə olan Cavid Hüseynovun azad ediləcəyi barədə xəbərlər yayılıb; futbolçunun həbs edilən qohumlarının onun günahının olmaması barədəki ifadələri nədən xəbər verir?
Teyfurə Əliyeva: “Həkimlərin ucbatından oğlumu itirmişəm”; Əsabəli Mustafayev: “Cavid Hüseynovun əməlinin ört-basdır edilməsindən narazıyıq

Avqustun 8-də “Qəbələ” futbol klubunun kapitanı Cavid Hüseynovun qohumları tərəfindən məlum hadisə ilə bağlı döyülərək, bir gün sonra 1 saylı Şəhər Kliniki Xəstəxanasında vəfat edən jurnalist Rasim Əliyevlə bağlı yeni xəbər bar. Belə ki, məhkəmə tibbi ekspertizası mərhum jurnalistlə bağlı rəyini açıqlayıb. Rəyə əsasən, onun ölümündə həkimlərin günahının olmadığı qeyd olunub.

Bu ayın ortalarında jurnalistin ölümü ilə bağlı həbs edilən futbolçu barəsində seçilmiş 3 aylıq həbs qətimkan tədbirinin müddəti başa çatır. Həbs müddətinin artırılacağı yaxud məhkəmənin başlayacağı barədə hələ də qərarın verilməməsi bəzi suallar yaradır. Xüsusilə, C.Hüseynovun həbs edilən qohumlarının cinayətdə onun əlinin olmaması ilə bağlı istintaqdakı ifadələri şübhəli məqamlar ortaya atıb. Bəzi iddialar var ki, “Qəbələ”nin oyunçusu məhkəmə olmadan azad ediləcək.




Mərhum jurnalistin anası Teyfurə Əliyeva “Yeni Müsavat”a açıqlamasında məhkəmə tibbi ekspertizasının rəyindən narazı qaldıqlarını söylədi: “Rasim həkimlərin günahı ucbatından rəhmətə gedib. Onlar vaxtında yardım etsəydilər, mənə oğlumun vəziyyətinin ağır olduğunu desəydilər, onu başqa yerə aparardım. Bilirəm ki, həkimlərin ucbatından oğlumu itirmişəm. Hər döyülən ölməz. Rasimə vaxtında yardım göstərilsəydi, o, ölməzdi. Burada həkimlərin günahı çoxdur. Belə bir rəyin verilməsi barədə fikir bildirmək çətindir. Rəylə yaxından tanış olacağıq. İstədikləri kimi rəy yazıblar. İstintaqı yox, əsas bu rəyi gözləyirdim. İstintaqla bağlı tez-tez çağırıblar. Bu rəy məni çox narahat etdi. Həkimlərin günahının olduğu dəqiqdir. Artıq Cavid Hüseynovun da həbs müddəti bitir. Həbs müddətinin artırılacağı yaxud məhkəməyə veriləcəyini yəqin ki, bizə deyəcəklər. Gedən proseslərlə bağlı çox narahatam”.



R.Əliyevin vəkili Əsabəli Mustafayev rəy qərarına tənqidi yanaşdıqlarını qeyd etdi: “Aydındır ki, Rasimin ölümünə səbəb döyülməsi olmuşdu. Bunun üçün biz də faktlar var ki, həkimlər vaxtında ona tibbi yardım göstərməmişdilər. Söhbət ondan getmir ki, tibbi xidmət olardısa, onun həyatını qorumaq olardı ya yox. Bu başqa məsələdir. Yaralı bir şəxsə düzgün diaqnoz qoymamaqdan söhbət gedir. Hamısı demişdi ki, hər şey normaldır. Rasimin müsahibəsinə baxanda görürük ki, o, öz paltarında uzanıb, palatadadır, kim istəyirsə, yanına gələ bilir. Həkimlər tərəfindən ciddi səhlənkarlıq olub. Öz vəzifələrini icra etməyiblər. Məsuliyyət məsələsini istintaq müəyyən etməlidir. Ona nə üçün tibbi xidmət göstərilməyib? Bilirik ki, səhiyyə məsələlərində kifayət qədər korrupsiya halları var. Bu səbəb ola bilərmi, yaxud Rasimi döyənlərlə həkimlər əlbir ola bilərlərmi? Bütün bunları istintaq müəyyən etməlidir. İstintaq qarşısında belə bir məsələ qaldırmışıq”.



Vəkil Cavid Hüseynovun həbs müddətinin bitmək üzrə olmasına da toxundu: “Cavid hadisə olandan 10 gün sonra həbs edilib. Onun ayın 20-ə qədər vaxtı var. 7 gün qalmışa qədər istintaq həbs müddətinin uzadılması ilə bağlı məhkəməyə müraciət etməlidir. Bu bizi ciddi narahat edir. İndiyə qədər bu məsələ ilə bağlı hər hansı bir qərar verilməyib. İstintaqın bitməsindən söhbət gedə bilməz. Bu mümkün deyil. İstintaq yekunlaşsa belə, cinayət işi ilə tanış olmaq ən azı bir ay vaxt aparır. Yəqin ki, yaxın günlərdə bu barədə dəqiq qərar veriləcək. İnanmıram ki, bu qədər ağır cinayətdə əli olan bir insan barəsində həbs qətimkan tədbiri qərarı dəyişdirilsin. Bu kiminsə istəyi ilə baş verə bilməz. Hamı bilir ki, bu prezidentin şəxsi nəzarətində olan bir işdir. Bu bəziləri üçün çəkindirici faktordur. Biz həkimlərin kənarda qalmasından narazıyıq. Cavid Hüseynovun əməlinin ört-basdır edilməsi hallarından da narazıyıq. Bununla bağlı vəsatətlərimizi vermişik. Hazırda həmin vəsatətlər üzrə araşdırmalar aparılır. Nəticəni gözləyirik. Ümid edirik ki, vəsatətlərimiz təmin olunacaq”.

Cavanşir ABBASLI

musavat.com