Azərbaycanda "qara bazar" Dolları bahalaşdırır

Marja.az portalı Azərbaycanda "qara valyuta bazarı" olduğunu dəfələrlə yazmasına baxmayaraq, təəssüf ki, Mərkəzi Bank və aidiyyatı orqanlar onların qarşısını tam ala bilməyib, "qara bazar" ilə mübarizə əvəzinə portalımız yalan məlumat yaymaqda ittiham olunub. Halbuki, elə Bakı şəhərində bir neçə ünvanda qanunsuz valyutadəyişmə məntəqələri açıq-aşkar fəaliyyət göstərirlər.
Bu valyutadəyişmə məntəqələri və onları idarə edən mafiya ölkədə Dolları bahalaşdırmaqla məşğuldurlar. 
Bu gün Marja.az-ın qanunsuz xarici valyuta alqısı-satqısı məntəqələrindən aldığı məlumata görə, Dolların satış qiyməti 1.71 manatı da keçərək 1.7120 manata yüksəlib. Bu qiymət dünən daha yüksək 1.7150 manat olub. Dolların alış və satışı ilə məşğul olanlar qiymətlərin daha da yüksələcəyini bildirirlər.
Qeyd edək ki, indiyədək "qara bazar"da dollar 1.7070-1.7080 manat qiymətlərə satılırdı.
Bu gün "Qara bazar"da dollar alanların çoxlu sayda olduğu müşahidə olunur. 
Mərkəzi Bank vətəndaşların banklardan xarici valyuta almasına məhdudiyyət tətbiq edib. Buna baxmayaraq "qara bazar"da dollar tapılır. Qeyri-rəsmi məlumata görə, Dollar "qara bazara" bir neçə bank əməkdaşları tərəfindən ötürülür. Əgər ölkədə kifayət qədər Dollar vəsaiti varsa nə üçün banklarda bu valyutanın satışına məhdudiyyət qoyulub? Bu məhdudiyyət "qara bazar"da fəaliyyət göstərən şəxslərin qazanmasına, əhalinin isə baha dollar alaraq itirməsinə səbəb olur. 
Marja.az portalı olaraq bir daha Mərkəzi Bankın  nəzərinə çatdırırıq ki, "qara bazar" gündən-günə genişlənir. Hələlik təhlükəsizlik və bu yerləri "reklam" etməmək məqsədlərilə "qara bazar"ın ünvanlarını yazmırıq. Lakin tezliklə onların qarşısını almasa ünvanları da dərc edəcəyik. 
Əhalinin əvvəlki illər ilə müqayisədə çətin vəziyyətdə olduğu bir dövrdə Dolların bahalaşdırılması, əhali arasında təşviş yaradılması qəbuledilməzdir. 
Dolların son günlər bahalaşması Maliyyə Nazirliyinin büdcə ilə əlaqədar izahatında "devalvasiya ehtimalı olduğunu" qeyd etməsi və bundan sonra bu barədə söz-söhbətlərin artmasıdır. Dünən Mərkəzi Bankın sədri Elman Rüstəmovun "Bu gün Azərbaycanda devalvasiya üçün əsas yoxdur" açıqlaması da təşvişi azaltmayıb.    
Qeyd edək ki, Mərkəzi Bankda keçirilən son valyuta hərraclarında dollara tələb artaraq 60 milyon dollar səviyyələrindən 80 milyon dollar səviyyələrinə yüksəlib.  Yoxsa bu tələbin artması "qara bazar"ın fəaliyyəti ilə əlaqədardır?!